Në pamje të parë, duken si kompani moderne dhe të suksesshme: zyra luksoze, kompjuterë të rinj, ambiente dinamike dhe të rinj që flasin në disa gjuhë të huaja. Por pas kësaj fasade biznesi, hetimet kanë zbuluar një realitet shumë më të errët.

Një pjesë e “Call Center”-ave në Shqipëri, dikur të konsideruara si mundësi punësimi për të rinjtë, janë shndërruar në struktura të organizuara mashtrimi financiar, ku operatorët kontaktojnë qytetarë të huaj duke u paraqitur si këshilltarë investimesh apo përfaqësues kompanish të ligjshme.

Bonuset e larta, pagesat cash dhe premtimi për fitime të shpejta kanë bërë që shumë të rinj të joshen nga ky sektor, ndërsa ekspertët paralajmërojnë se fenomeni po krijon një normalizim të rrezikshëm të sjelljes kriminale. Sipas tyre, rreziku nuk lidhet vetëm me viktimat e mashtrimit, por edhe me kriminalizimin gradual të një brezi të ri, i cili fiton aftësi teknike dhe kontakte që mund të përdoren më pas në aktivitete të tjera të paligjshme.