Tifozët e Barcelonës mund të jenë shumë pranë një skenari që e kanë ëndërruar prej kohësh: shpalljes kampionë të Spanjës në një “El Clasico” kundër rivalit historik, Real Madridit.

Skuadra e drejtuar nga Hansi Flick ka mundësinë të sigurojë zyrtarisht titullin e La Liga-s të dielën, më 10 maj, në “Camp Nou”. Pas 34 javësh të luajtura, Barcelona kryeson renditjen me 88 pikë, 11 më shumë se Real Madridi i vendit të dytë, ndërsa deri në fund të kampionatit kanë mbetur edhe katër ndeshje.

Kjo do të thotë se katalanasve u mjafton edhe një pikë ndaj Real Madridit për t’u shpallur matematikisht kampionë. Megjithatë, duke parë formën dhe ambicien e skuadrës, është e qartë se Barcelona nuk do të hyjë në këtë përballje vetëm për një barazim.

“El Clasico” e radhës pritet të jetë shumë më tepër se një ndeshje e zakonshme. Për Barcelonën, fitorja e titullit përballë Real Madridit do të ishte mënyra më e ëmbël për të kurorëzuar sezonin, ndërsa për madrilenët do të ishte një nga skenarët më të vështirë për t’u pranuar.

Një sukses i tillë ndaj rivalit historik konsiderohet shpesh si “goditje e dyfishtë”: fitimi i trofeut dhe njëkohësisht mposhtja morale e kundërshtarit më të madh. Pikërisht këtë do të synojë Barcelona në një mbrëmje që mund të mbetet gjatë në kujtesën e tifozëve katalanas.

Megjithatë, skuadra pritet të ketë mungesa të rëndësishme. Lamine Yamal raportohet se është dëmtuar së fundmi, ndërsa edhe forma e Kylian Mbappe te Real Madridi mbetet në qendër të diskutimeve.

“El Clasico” do të luhet të dielën, duke nisur nga ora 21:00.